आज या भागात चक्रीवादळ धडकन्याची शक्यता हवामान विभाग.

कोकण, मध्य महाराष्ट्रात पावसाचा जोर कायम; गडचिरोली, चंद्रपूर, यवतमाळ आणि गोंदिया जिल्ह्यांत वादळी वाऱ्यासह अतिवृष्टीचा इशारा

विशेष प्रतिनिधी, पुणे:
राज्यात परतीच्या पावसाने रौद्र रूप धारण केले असून, बंगालच्या उपसागरातील ‘मोंथा’ चक्रीवादळ आणि अरबी समुद्रातील कमी दाबाची प्रणाली या दुहेरी हवामान संकटामुळे महाराष्ट्रात पावसाचा जोर वाढला आहे. ‘मोंथा’ हे तीव्र चक्रीवादळ आज 29 ऑक्टोबर) रात्री आंध्र प्रदेशातील काकीनाडाजवळ किनारपट्टीला धडकणार असून, त्याचे अवशेष राज्याच्या दिशेने सरकणार आहेत. या प्रभावामुळे बुधवार आणि गुरुवारी विदर्भात वादळी वाऱ्यासह मुसळधार ते अतिमुसळधार पावसाचा इशारा देण्यात आला आहे.

मागील २४ तासांतील पावसाची नोंद
गेल्या २४ तासांत राज्याच्या अनेक भागांत पावसाने जोरदार हजेरी लावली. विशेषतः उत्तर महाराष्ट्रातील नंदुरबार जिल्ह्यात मुसळधार पावसाची नोंद झाली, तर धुळे, जळगाव आणि छत्रपती संभाजीनगर जिल्ह्यांतही मध्यम ते जोरदार पाऊस झाला. कोकण किनारपट्टीवर ठाणे, पालघर आणि रायगड जिल्ह्यांत पावसाचा जोर कायम होता. मध्य महाराष्ट्राच्या बहुतांश भागांत हलक्या ते मध्यम सरी बरसल्या, तर दक्षिण विदर्भातही पावसाची उपस्थिती होती.

पावसाची सद्यस्थिती आणि चक्रीवादळाचा प्रवास.

सध्या जळगाव, छत्रपती संभाजीनगर आणि जालना जिल्ह्यांत पावसाळी ढगांची दाटी असून जोरदार पाऊस सुरू आहे. लातूर, नांदेड आणि परभणी जिल्ह्यांतही पावसाची तीव्रता वाढत आहे. रात्री उशिरा ते पहाटेच्या दरम्यान यवतमाळ, चंद्रपूर आणि गडचिरोली जिल्ह्यांत पावसाला सुरुवात होण्याचा अंदाज आहे.

राज्यातील या पावसाळी स्थितीमागे दोन प्रमुख कारणे आहेत. बंगालच्या उपसागरात तयार झालेले ‘मोंथा’ हे तीव्र चक्रीवादळ आज रात्री किनारपट्टीवर धडकल्यानंतर त्याचा जोर कमी होईल. मात्र, या प्रणालीचे अवशेष छत्तीसगडमार्गे महाराष्ट्राच्या पूर्व भागाकडे सरकल्याने विदर्भात पावसाचा जोर वाढेल. दुसरीकडे, अरबी समुद्रातील कमी दाबाची प्रणाली (डिप्रेशन) आता अधिक तीव्र झाली असून, ती उत्तर-पश्चिम दिशेने पुढे सरकत आहे. या प्रणालीमुळे कोकण आणि मध्य महाराष्ट्रात बाष्पयुक्त वारे खेचले जात असल्याने तेथे पाऊस सक्रिय आहे.

आज (बुधवार, २९ ऑक्टोबर) सविस्तर जिल्हानिहाय अंदाज
विदर्भ (ऑरेंज आणि येलो अलर्ट):

उद्या ‘मोंथा’ चक्रीवादळाचा सर्वाधिक प्रभाव पूर्व विदर्भात जाणवेल. यवतमाळ, चंद्रपूर, गडचिरोली आणि गोंदिया या जिल्ह्यांना हवामान विभागाने ऑरेंज अलर्ट दिला आहे. या भागांत ताशी ४० ते ५० किलोमीटर वेगाने वादळी वारे वाहण्यासह मुसळधार ते अतिमुसळधार पावसाची (६५ ते ११५ मि.मी. पेक्षा जास्त) शक्यता आहे. त्याचबरोबर भंडारा, नागपूर, वर्धा, वाशिम आणि अमरावती जिल्ह्यांत विजांच्या कडकडाटासह जोरदार पावसाचा येलो अलर्ट देण्यात आला आहे.

मराठवाडा आणि उत्तर महाराष्ट्र:

हिंगोली, नांदेड, परभणी आणि लातूर या जिल्ह्यांत मुसळधार पावसाची शक्यता आहे. छत्रपती संभाजीनगर, जालना, बुलडाणा, जळगाव, धुळे आणि नंदुरबार जिल्ह्यांत विजांच्या कडकडाटासह मध्यम ते जोरदार सरी बरसतील.

कोकण आणि मध्य महाराष्ट्र:
कोकणातील मुंबई, ठाणे, पालघर, रायगड, रत्नागिरी आणि सिंधुदुर्ग या सर्व जिल्ह्यांत मध्यम ते जोरदार पावसाच्या सरींची शक्यता आहे. मध्य महाराष्ट्रातील नाशिक, पुणे आणि सातारा घाट परिसरातही पावसाचा जोर कायम राहील.

गुरुवार, ३० ऑक्टोबरचा अंदाज
गुरुवारी राज्यातील पावसाचा जोर काही प्रमाणात कमी होईल. मात्र, उत्तर महाराष्ट्र आणि कोकणात पावसाच्या सरी कायम राहतील. विदर्भातील अमरावती, नागपूर, भंडारा आणि गोंदिया येथे विजांच्या कडकडाटासह मुसळधार पाऊस होऊ शकतो. राज्याच्या दक्षिण भागातील सोलापूर, सांगली, कोल्हापूर येथे पावसाची शक्यता तुलनेने कमी असेल. शेतकऱ्यांनी, विशेषतः विदर्भातील शेतकऱ्यांनी, वादळी वाऱ्याच्या शक्यतेमुळे शेतीकामांचे योग्य नियोजन करावे आणि पिकांची काळजी घ्यावी, असे आवाहन हवामान तज्ज्ञांकडून करण्यात आले आहे.

ताज्या बातम्या

पंजाब डख म्हणतात चक्रीवादळ महाराष्ट्रातून जानार राज्यात एवढे दिवस मुसळधार पाऊस.